Ye Hielans and ye Lawlans
O whaur hae ye been?
They hae slain the Earl o' Murray
And laid him on the green

He was a braw callant
And played at the ba'
And the bonnie Earl o' Murray
Was the floo'er o' them a'

O, wae betide ye, Huntly
And whaurfor did ye sae?
I bade ye bring him tae me
Never him to slay.

He was a braw callant
And he played at the ring,
And the bonnie Earl o' Moray
He micht hae been king.

Lang may his lady
Look frae the castle doon
Ere she see the Earl o' Moray
Come ridin' through the toon.

He was a braw callant
And played at the glove,
And the bonnie Earl o' Moray
He was the Queen's love.